இணைய தளம் தொடக்கம்...தொடர் நிகழ்வுகள்

 ஓய்வு பெற்ற அலுவலர் சங்கத்தின் இணையதளம் தொடக்கம். அதன் தொடர்சியாக அளித்த பேட்டி.

https://www.youtube.com/watch?v=LbcmcrfGg-4&list=PPSV&t=3s 

எனது பேட்டியை காண விரும்புவர்கள் இந்த லிங்கை கிளிக் செய்து பார்க்குமாறு வேண்டுகிறேன்.

மாவட்ட தேர்தல் மற்றும் இணையதளம் துவக்க நிகழ்வு...

ஓய்வு பெற்ற அலுவலர் சங்க இணையதளம் துவக்கம்

இம் மாதத்தில் 07.12.2024 முதல் சனிக்கிழமை காலை 10 மணியளவில் திண்டுக்கல் மாவட்ட தேர்தல் சிறப்பாக நடந்து முடிந்தது. மதுரை மாவட்ட தலைவரும், தேர்தல் ஆணையருமான திரு.ராமானுஜம் அவர்கள் வெற்றி பெற்ற மாவட்ட நிர்வாகிகளின் பெயர்களை வெளியிட்டு, உறுதிமொழி ஏற்றபின் தேர்தல் பணிகள் நிறைவு பெற்றது.

தேர்தல் பணிகள் முடிந்தவுடன், ஆத்தூர் வட்டம் @ சின்னாளபட்டி கிளையின் தலைவர் திரு.சீனி. நாமதேவன் அவர்களால் உருவாக்கப்பட்ட ஓய்வு பெற்ற அலுவலர் சங்கம், திண்டுக்கல் மாவட்டத்தின் இணையதளம், புதிதாக தேர்வு செய்யப்பட்ட தலைவர் திரு. S.M.தம்பிதுரை அவர்களால் துவக்கி வைக்கப்பட்டு உறுப்பினர்களின் பயன்பாட்டுக்கு வெளியிட்டார். மதுரை மாவட்ட தலைவர் தனது பாராட்டுரையில் இந்நிகழ்வு மகிழ்சியளிப்பதுடன் தமிழ் நாட்டில் இது தான் முதல் முயற்சி என்று குறிப்பிட்டது அனைவருக்கும் மகிழ்சியான செய்தி என்பதுடன், குறிப்பாக நாமதேவன் அவர்களுக்கு நல்ல மன நிறைவினை அளித்தது .

ஓய்வூதியம் என்றால் என்ன? பகுதி 4

ஓய்வூதிய மாற்றம்

23 வது சட்டமாக இயற்றப்பட்ட "Pension act" 1871 ஆண்டு முதல் நடைமுறைக்கு வந்தது. அன்றைய தினத்தில் அரசுப்பணியிலிருந்த அன்னிய ஆங்கிலேய நாட்டவருக்காக இச்சட்டம் ஆங்கிலேய அரசால் இயற்றப்பட்டது. இந்திய நாடு சுதந்திரம் பெற்று 71 ஆண்டுகள் கடந்த நிலையில், 147 ஆண்டுகளுக்கு முந்தைய நாளில் இயற்றப்பட்ட "Pension Act" என்ற உளுத்துப்போன சட்டத்தினை இன்றுவரை விடாமல் தூக்கிகொண்டு அலைகிறோம் என்பது வேதனையின் உயர்மட்டமாகும். அதுவும் அச்சட்டங்கள் பல மாமாங்களை கடந்தும், பல நீதிமன்றங்களின் தன்னிச்சையான தீர்ப்புகளால் சக்தியற்றுப்போய் ஏட்டளவில் உள்ளது என்பதே உண்மையாகும்.

இந்த சூழலில், பலகட்ட தொடர் முயற்றசிக்குப் பின், முன்னாள் அமைச்சர் திரு.காட்கில் மாற்று சட்ட மசோதா சமர்பித்த பின்பும் அரசும், அதிகார வர்க்கமும் விடாப்பிடியாக ஆங்கிலேய அரசு விட்டுச்சென்ற அடிமை சட்ட வடிவுகளை மாற்ற மறுக்கிறது. இந்த அரைகுறை ஓய்வூதிய சட்டங்களும் நமக்கு குறைந்த பட்ச நலன்களை அவ்வப்போது அளித்திருக்கிறது என்பதை நாம் ஒருபோதும் மறுதளிக்க முடியாது. அவைகளில் ஒன்று 1834 மற்றும் 1887 ஆம் ஆண்டுகளில் பணிநிறைவு தொடர்பான சட்டங்கள் இயற்றப்பட்டது. அதனடிப்படையில் அன்னிய நாட்டவர்கள் பணி ஓய்வு பெற்ற போது உருவான காலிப்பணியிடங்களில் இந்திய நாட்டவர்களையும் பணியில் அமர்த்த வேண்டும் என்ற கட்டாய தேவைகளும், கோரிக்கைகளும், ஏழுப்பப்பட்டது.

அதன் தொடர்ச்சியாக 1896-1897 ஆம் ஆண்டில் எட்சிசன் ஊதியக்குழு ( Atchison Commission ) அமைக்கப்பட்டு அதன் பரிந்துரைகளை பெறப்பட்டது. இவ்வறிக்கையில் ஒப்பந்தப்பணி (Covenantee) ஒப்பந்தமற்ற பணி ( Noncovenantee) என இரு பிரிவுகளை உருவாக்கியது. ஒப்பந்தபணி அனைத்திலும் அன்னிய ஆங்கில நாட்டவரும், ஒப்பந்தமற்ற பணியில் இந்திய நாட்டவரும் பணி அமர்த்தப்பட்டனர் ஒப்பந்த பணியாளர்கள் Superior service என்றும் நம் நாட்டவர் Inferior service என்றும் பாகு படுத்தப்பட்டனர். இக்காலத்தில் ஆளுநர் மெக்காலே பிரபு இந்திய நாட்டவருக்கு ஆங்கில மொழி கற்றுத்தந்து அவர்களை எழுத்தர்களாக (Clerks) அரசுப் பணியில் நியமிக்கப்பட்டனர். இப்போது அரசுப்பணியில் இருந்த அயல்நாட்டவர்கள் Imperial Services என்றும் இந்திய நாட்டவர்கள் Provincial Services என்றும் பிரிக்கப்பட்டனர். இவர்களுக்கான ஊதியம் மற்றும் பின் ஊதியம் வேறுபட்டது. இதற்கு பின் 1908ல் சர்ஜேம்ஸ் குழுவும், லால் குழுவும் அமைக்கப்பட்டு பரிந்துரைகள் பெறப்பட்டது. ஆனால் அப்பரிந்துரைகளில் சிறப்பான அம்சங்கள் இல்லாத நிலையில் அனைவரின் கவனத்தை அவ்வறிக்கைகள் ஈர்க்கவில்லை.

1912-1915ல் இஸ்லிங்டன்குழு (Islington Commission) அமைக்கப்பட்டது. இக்குழு முதல்முறையாக மற்றைய அதிகாரங்களுடன் இந்திய தன்மையுடன் ஆங்கில அமைப்பை ஒத்திட்டு இந்திய நாட்டவர்களுக்கு ஓய்வூதியம், ஈட்டூதியம் போன்றவற்றை பரிசீலிக்குமாறு பணிக்கப்பட்டது. இக்குழுவின் பரிந்துரைகள் 1915 , ஆகஸ்டில் பெறப்பட்ட போதும், உலகமகா யுத்தத்தினால் அமல்படுத்த முடிவில்லை.ஆகவே அக்குழுவின் அறிக்கை 1919 ஆண்டிற்கு தள்ளி வைக்கப்பட்டது. இவ்வூதியக்குழு தான் முதன்முறையாக இந்திய நாட்டிற்கான பணிவிதிகள், ஊதியம் மற்றும் ஓய்வூதியம் தொடர்பான வழிமுறைகளை அறிக்கைகளாக அளித்து சட்டமியற்ற உதவியது. இதனடிப்படையில் அன்னிய மற்றும் இந்திய பணியாளர்களின் பாகுபாடுகள் படிப்படியாக நீக்கப்பட்டு ஒருங்கிணைக்கப்பட்டனர். இந்த ஒருங்கிணைப்பை உள்ளடக்கி உருவாக்கப்பட்டது தான் " Civil Service Regulations" ஆகும்.

இராணுவத்தில் பணியாற்றுபவர்கள் தவிர்த்து, மற்ற பணியாளர்கள் அனைவருக்கும் இவ்விதிகளின் படியே அனைத்து ஓய்வூதியம் மற்றும் ஈட்டூதியங்கள் 1972 வரை வழங்கப்பட்டது. 1919 ல் இயற்றப்பட்ட விதிகளின் படி ஊதியம், ஓய்வூதியம் முதலியன 09.08.1919 முதல் அமலுக்கு வந்தது. ஆகவே இந்நாளுக்கு முன் மற்றும் பின் பணியேற்ற பணியாளர்களுக்கு ஓய்வூதிய நலன்கள் முன், பின் என பிரிக்கப்பட்டது.

தொடரும்.....

ஓய்வூதியம் என்றால் என்ன? பகுதி 3

"நகரா" தீர்ப்பு

கடந்த கட்டுரை பகுதி 2ல் ஓய்வூதியம் பற்றி ஒரு தெளிவான முடிவிற்கு வந்து சேர்ந்தோம். அதாவது "ஓய்வூதியம் என்பது முன் செய்த பணிக்கு பின் வழங்கும் பின் ஊதியம்" என்பது  புலனாகிறது.

இதன் வழியில்  EPF என்றோ அல்லது CPF என்றோ அழைக்கப்படும் வைப்பு நிதிக்கு இறுதியாக வட்டியுடன் வழங்கப்படும் மொத்த தொகையையும் ஓய்வூதியம் என்றே கொள்ளலாம். Provident Fund விதிப்படி பணியாளரும், பணிவழங்குபவரும் சரியான அளவில் பணம் செலுத்த வேண்டும். பெறும் ஊதியத்தில் பணியாளர் செலுத்தும் பங்கும், அதே அளவு நிர்வாக தரப்பிலும் (தற்போது உச்ச நீதி மன்றம் சில மாறுதல்களை வழங்கி ஆணையிட்டுள்ளது. அதை பின்பு விரிவாக காண்போம்) நிர்ணயிக்கப்பட்ட தொகையில் பிடித்தம் செய்யப்படும். ஒய்வு பெறும்போது அச்சேமிப்புக்கு உரிய வட்டி சேர்த்து மொத்த தொகையாக வழங்கப்படுகிறது. இதை ஈட்டிய ஊதியம்- ஈட்டூதியம் என கணக்கில் கொள்ளலாம். 4வது ஊதியக்குழுவின் கவனத்திற்கு பணியாளர்கள் சார்பாக அளிக்கப்பட்ட மனுவில் PF ல் செலுத்தும் பணத்தை ஒரு வங்கியில் நிரந்தர வைப்பு நிதியாக செலுத்தி, ஓய்வு பெறும் போது ஈட்டியுள்ள வட்டியிலிருந்து மட்டுமே இறுதியாக பெற்ற ஊதியத்திற்கு இணையான தொகையை ஓய்வூதியமாக மாதா மாதம் வழங்க முடியும் என எடுத்துரைக்க ப்பட்டது. ஆனால் இதன்மேல் இன்று வரையிலும் எவ்வித பதிலும் அரசிடமிருந்து இல்லை. 

இதே முடிவை 1982ல் வியன்னாவில் ஐக்கிய நாட்டு அமைப்பின் ஆலோசனைப்படி கூடிய உலக நாடுகளின் முதியோர் மாநாட்டில் ஓய்வூதியம் என்றால் ஈட்டிய ஊதியம் (Earned Income) என தெளிவாக அறிதியிட்டு பிரகடனம் செய்தது. ஆகவே இது நமது ஈட்டூதியம் அல்லது சேமிப்பு அல்லது தாமதிக்கப்பட்ட ஊதியம் (Deferred pay or wages) என்பதும் புலனாகிறது. இவைகளைப்பற்றி முதலில் நாம் தெளிவானால் தான் அதிகார வர்க்கம் எழுப்பும் அனைத்து தடைகளையும் எதிர்த்து வெற்றி பெறமுடியும்.

இம்மாதிரியான பல முடிவுகள் ஓய்வூதியத்திற்கு ஆதரவாக வரவே இந்திய அரசு தனது நிதித்துறையின் மூலமாக "ஓய்வூதியம் என்பது பரிசு அல்ல அது அரசின் பொறுப்பு" என்ற முடிவினை வெளியிட்டது (U.N.NO.D 2776/EV/52 DT 8.5.1959) அந்த முடிவின் அடிப்படையில் ஓய்வூதியத்தை உரிமையாக கோரி பெற வழிவகை ஏற்பட்டது. ஆனால் அரசு காலப்போக்கில் இதை மறைத்து ஒரு பணியாளர் பணியிலிருந்து ஓய்வு பெற்ற பின் அரசுடன் யாதொரு தொடர்பும்(No Nexus) இல்லை என்றுரைத்தது. அக்கூற்றினை  நிதி அமைச்சர் தொடங்கி அதிகார வர்க்கம் முழுதும் விடாப்பிடியாக வலியுறுத்தி வந்தனர்.

இவ்வீண் பிடிவாதம் 17.12.1982ல் உச்ச நீதி மன்றம் வழங்கிய உன்னதமான தீர்ப்பால் அடித்து நொறுக்கப்பட்டது. அப்புகழ் பெற்ற தீர்ப்பு தான் "நகரா தீர்ப்பு". "பென்சன் என்பது கருணை தொகை அல்ல". ஓய்வு பெற்ற பணியாளரின் மறுக்க முடியாத உரிமை. பணியிலுள்ள ஒருவர் என்ன வசதியான வாழ்க்கை வாழ்ந்தாரோ அதே நிலையில் அத்துனை வசதிகளுடன் வாழ வேண்டும் என்று அறிதியிட்டு  வழங்கிய தீர்ப்பு. இந்நிலையிலும் மத்திய அரசின் ஓய்வூதிய அமைச்சருடன் தன்னார்வ நிறுவனங்களின் நிரந்தர குழு (Standing committee of voluntary agencies) நடத்திய கலந்துரையாடலின் போது நகரா தீர்ப்பு அரசுக்கு எதிரானது, ஏற்கக் கூடாது என அரசு தரப்பில் வாதிடப்பட்டது.

இதிலிருந்து ஓய்வூதியத்திற்கு எதிரான மனநிலை அதிகார வர்க்கத்தில் ஆழமாக உள்ளது என்பது கண்கூடு். அத்தீர்ப்பின் மூலம் பெறப்பட்ட ஓய்வூதிய உரிமைகளை எவ்வழியாவது பறித்து விட தொடர் முயற்சி அரசு மேற்கொண்டு வருகிறது என்பது நிதர்சனமே. ஆனால் மூத்தோர் பெருந்திரள் ஒருநாளும் அனுமதிக்காது என்பதும் திண்ணமே.

இனி பின்ஊதியம் என்ற ஓய்வூதியம் எவ்வாறெல்லாம் வளர்ந்தது என ஆராயலாமா? வாருங்கள் பகுதி 4க்கு.

தொடரும்.....

ஓய்வூதியம் என்றால் என்ன? பகுதி 2

முந்தையகால ஓய்வூதியம்

ஓய்வூதியம் தொடர்பாக இந்திய நிர்ணய சட்டத்தில் வழங்கப்பட்ட பாதுகாப்பு போன்று
எவ்விதமான அமைப்புகளும் முந்தைய காலங்களில் இல்லை என்றே அறியவருகிறது. மேலும் ஓய்வூதியம் பற்றி விரிவான விளக்கங்கள் இல்லை என்றபோதிலும்  "ஜீவிதம்" என்றொரு அமைப்பு இருந்தது என்றும், அத்துடன் பழைய தமிழ் அகராதியில் உபகாரச் சம்பளம், வருஷாமனம், தெளஜி, பரணம் போன்ற சொற்கள் ஓய்வூதியத்திற்கு பதிலாக   பயன்படுத்தப்பட்டது என்பதும் தெரியவருகிறது. மேலும் கெளடில்யரின் " அர்த்த சாஸ்திரத்தில்" இருவகையான ஓய்வூதியம் பற்றி குறிப்புகள் காணப்படுவதாக சுட்டிக்காட்டப்பட்டுள்ளது.

இவைகள் தவிர பண்டைய மன்னர்கள் தங்களின் கீழ் பணியாற்றிய மந்திரிமார்கள் மற்றும் அரசவை உயர் அதிகாரிகளுக்கு பொன், பொருள், வீடு, நிலம் பொன்றவற்றை இனாமாக, அவர்களது வாழ்நாள் முழுதும் அனுபவித்துக் கொள்ள, வழங்கி இருந்தனர் என்பதை வரலாற்று நூல்களின் பல பக்கங்களின் பதிவு செய்யப்பட்டு இறைந்து கிடக்கிறது. அத்துடன் போர் படை தளபதிகள், அவர்களின் கீழ் பணியாற்றிய படை வீரர்கள், போர்களில் வீரமரணம் அடைந்த வீரர்களின் குடும்பத்திற்கு, என பலதரப்பட்டவர்களுக்கும் பல கிராமங்கள் தானமளிக்கப்பட்டது. அவைகளை பாளையங்கள் என்றும், உரிமையாளர்களை  பாளையக்காரர்கள் என்றும் அழைக்கப்பட்டனர் என்பதும் வரலாற்றின் நெடுகிலும் பதிவு செய்யப்பட்டுள்ளது. இச் செயல்கள் அனைத்தும் நேரடியாக ஓய்வூதியம் என்ற பெயரில் அழைக்கப்படவில்லையே தவிர,  அனைத்தும் ஓய்வூதியம் போல ஒத்திருந்தது என கணக்கில் கொள்ளலாம்.

ஆனால் 16ஆம் நூற்றாண்டில் வெளியான Century Dictionary (Encyclopedia Lexicon) ல் ஏறக்குறைய சரியான வரையறையினை ஓய்வூதித்தின் பால் வெளியிடுகிறது. அரசுப்பணியில் இருந்த பொது அதிகாரிகள், போர்வீரர்கள், கடற்படை வீரர்கள், போன்ற அனைத்து பணியாளர்கள், பணி விடுப்பு பெற்றவர்கள்,  முழுமையாகவோ அல்லது விபத்தில் காயம்பட்டு உருகுலைந்தவர்கள், அல்லது மரணமடைந்தவர்களின் குடும்பம்  போன்றோர்களுக்கு காலாகாலமாக பெற்று வந்த ஊதிய தொகைக்கு நிகரான தொகை வழங்கப்பட்டுள்ளதாக தெரிய வருகிறது. சுருங்க கூறின் "முன்னர் பணியாற்றிய ஒருவருக்கோ அல்லது வேறு ஒருவருக்கோ முன்னர் ஆற்றிய பணிக்கு ஈடாக வழங்கப்படும் பின்னூதியம்" என கணிக்கலாம்.

மேற் குறிப்பிட்ட விபரங்களை தெளிவாக கவனத்தில் கொண்டு நான்காவது ஊதியக்குழு தனது அறிக்கையில் பத்தி 2 மற்றும் 3 ல் பதிவு செய்தது."நல்ல ஓய்வூதியம் என்பது பணிகாலத்தில் பெற்ற நன்மைகள் போல ஓய்வு காலத்தில் மதிக்கப்படவேண்டும்" என்றும் பிரகடனப்படுத்தியது.  

தொடரும்....

ஓய்வூதியம் என்றால் என்ன? பகுதி 1

ஓய்வூதிய தொடக்கம்

" பென்சனா அதுல என்ன சார் இருக்கு தெரியிரதுக்கு ... அது என்ன ஒரு தலைவரா? அல்லது ஒரு அரசியல் கட்சியா? தொடக்கம், வளர்ச்சி, வரலாறு என்று சொல்லுவதற்கு.

'இப்ப போயி இத பேசிக்கிட்டு, ஏதாவது பணம் கூட்டிக்குடுக்கிறாங்களானு பாருக்க சார். சென்ட்ரல் கவர்மெண்டில் 2% டிஏ சொல்லியாச்சாம் நமக்கு எப்பனு சொல்லுங்க " போன்ற சொல்லாடல்கள் தான் தற்போது அதிகமாக நமது காதுகளில் ஒலிக்கின்ற குரலாக இருக்கிறது.

ஓய்வூதியத்தின் ஆதித்தோற்றுவாய், அதன் வளர்ச்சி, இன்றைய நிலை (பாங்களிப்பு ஓய்வூதியம்) போன்றவற்றை அறிந்து கொள்ள வேண்டும் என்ற அக்கறை இன்மையே காரணம். திரைப்படம் ஒன்றில் சிரிப்பு நடிகர் திரு. வடிவேலு அவர்கள் சொல்வது போல " பில்டிங் ஸ்ட்ராங், பேஸ்மண்ட் வீக்" என்பது போல ஓய்வூதியத்தின் அடிப்படை தெரியாமல் நம்மில் பல பேர் ஓய்வூதியம் பற்றி பேசி வருகிறோம்.

ஓய்வூதியம் என்பது ஒரு பள்ளிப் பாடமல்ல. பல சிக்கல்களை தன்னகத்தே கொண்டுள்ள ஒரு விதித் தொகுப்பு. இதற்கான சட்டங்களையும் விதிகளையும் உள்ளடக்கி ஆணைகளாக வெளியிட்டுள்ள மத்திய, மாநில அரசுகள் இதன்மீது எவ்வித சட்ட வறையறைகளை (Constitutional definition) உருவாக்கி இணைக்க வில்லை என்பதை கவனத்தில் கொள்ளவேண்டும். ஒரு சட்ட வடிவு அல்லது ஒரு விதியின் வடிவு என்றால் அவைகள் முக்கியமாக எந்தப் பொருளை குறிக்கின்றதோ அந்த சொல் அல்லது சொற்றொடரின் வறையறை (Definition) இல்லாவிடில் அவை முழுமையான சட்டமாகவோ அல்லது விதியாகவோ கணக்கில் கொள்ள முடியாது.

முதல் ஊதியக்குழுவிலிருந்து நான்காவது ஊதியக்குழு வரையிலும் வறையறைகள் ஏதுமில்லா நிலையில் ஊதியக்குழுக்கள் தத்தம் பரிந்துரைகளை அரசுக்கு சமர்பித்து வந்தது. இதன் தொடர்ச்சியாக ஐந்தாவது ஊதியக்குழுவும் அமைக்கப்பட்டு ஓய்வூதிய சங்கங்களிடமிருந்து கருத்துகள் கேட்கப்பட்டது. இதுவரையிலும் வாளாவிருந்த சங்கங்கள் இம்முறை கடுமையாக வாதாடியும், தொடர்ந்த வற்புறுத்தலாலும்  ஓய்வூதியம் பற்றிய வறைமுறைகள் ஊதிய குழு அறிக்கை பாரா 127(2) சேர்க்கப்பட்டது. அதுவும் முத்தாய்ப்பாக இந்திய அரசியல் சட்டத்தின்  366(17) பிரிவின் படி நிர்ணயம் செய்யப்பட்டு இருந்த வறையறையினை பதிவு செய்தது.

366(17) ன் சுருக்கம் " Pension means a pension, and includes Retired Pay so payable whether contributory or not, of any kind whatsoever payable to or in respect of any person and any sum or sums so payable by way of the return, with or without interest there on or any other addition thereto, of subscription to a provident fund"

இவை போன்ற ஒரு பாதுகாப்பு பண்டைய காலத்தில் இருந்ததா?

இக்கேள்விக்கான பதிலை பகுதி 2 ல் தேடுவோம்... தொடரும்...